” اگلی پریس کانفرنس بلے کے دفتر کے باہر کروں گا “ یہ بلا کون ہے ؟ عابد شیر علی فیصل واوڈا کے پیچھے پڑ گئے
سابق وزیر مملکت اور ن لیگی رہنما عابد شیر علی نہا دھو کر وفاقی وزیر فیصل واوڈا کے پیچھے پڑ گئے ہیں اور انہوں نے آج لندن سے ’ پراپرٹیز آف فیصل واوڈا ‘ سیزن کی چوتھی قسط جاری کر دی ہے جس میں انہوں نے ایک نئے نام ’’ بلا‘‘ کا انکشاف کیاہے جو کہ ان کے مطابق فیصل واوڈا کا فرنٹ مین ہے ، عابد شیر علی نے کہا کہ وہ اگلی پریس کانفرنس ان کے دفتر جا کر کریں گے۔
عابد شیر علی نے لندن میں پاکستانی میڈیا کے نمائندوں کو ڈھونڈ نکالا اور ان سے گفتگو کرتے ہوئے کہا کہ ’’ میں نے ایک مشن شروع کیا ہے ، فیصل واوڈا کی لندن میں بہت لگژری پراپر ٹیز ہیں ، پی ٹی آئی رہنما نے کہا عابد شیر علی نشے کی حالت میں بات کرتا ہے اور لندن کی ہر جگہ پر کھڑا ہو کر بولتا رہا۔ عابد شیر علی کا کہناتھا کہ مجھے بولنے کی ضرورت نہیں ہے میں نے تو عام پاکستانی کی حیثیت سے آپ کے آمدن کے ذرائع پوچھے ہیں اور آپ نے جو پیسہ بیرون ملک منتقل کیا اس سے متعلق سادہ سا سوال کیا تھا ۔
عابد شیر علی نے ہاتھ میں تھامے پرچے کیمرے میں دکھاتے ہوئے کہا کہ یہ الیکشن کمیشن میں جمع کروائی گئی آپ کے اثاثوں کی کاپی ہے جس میں آپ نے آر او کی ملی بھگت کے ساتھ پراپرٹیز ہیں، اور پراپیرٹیز کے ایڈریس کے عین اوپر سٹیمپ کیا گیا ہے تاکہ ٹیکنیکلی اس کو کوئی پڑھ ہی نہ سکے ۔ان کا کہناتھا کہ آپ نے پوری قوم سے جھوٹ بولا ہے ، جو آپ نے ان پراپرٹیز کی مالیت بتائی ہے ۔
عابد شیر علی کا کہناتھا کہ میں نے ہائیڈپارک، کورڈاینگل اور ایلگن سکوائر کے اندر کھڑے ہو کر بات کی اور آپ کی پراپرٹیز کا نام لیا ،آپ تو مان ہی نہیں رہے تھے کہ لندن میں کوئی پراپرٹی ہے اور اگر لندن میں آپ کی کوئی پراپٹریز نہیں تھیں تو آ پ نے چھپایا کیوں۔ عابد شیر علی کا کہناتھا کہ آپ نے ان فلیٹس اور اپارٹمنٹس کی جو مالیت ظاہر کی ہے وہ اصل قیمت کے ساتھ میل نہیں کھاتی کیونکہ الگن سکوائر میں تمام سلیبریٹیز رہتی ہیں اور وہاں پر پراپرٹی کی قیمت تین سے چار ملین پاونڈ تک ہے جبکہ آپ نے جو مالیت کاغذات میں ظاہر کی ہے اتنے پیسوں میں تو آپ پاکستان میں فلیٹ پراپرٹی نہیں خرید سکتے تو پھر آپ نے لندن میں کیسے خریدی۔
عابد شیر علی کا کہناتھا کہ یہ آپ کی تمام پراپرٹیز کی میرے پاس ڈیٹیل ہے ، میں ہوا میں تیر نہیں چلا رہا ہوں ، یہ کاغذات میرے پاس موجود ہیں ، اس کی انوسٹی گیشن ہونی چاہیے، چاہیے،میرا سوال یہ ہے کہ آپ نے یہ جائیدادیں کن ذرائع سے بنائی ہیں ۔ عابد شیر علی نے دعویٰ کیا ہے کہ آپ نے فرنٹ مین رکھا ہوا ہے جس کا نام ’’بلا‘‘ ہے اور کل میں بلے کے دفتر کے سامنے جا کر پریس ٹاک بھی کروں گا جو کہ آپ کا فرنٹ مین ہے۔جس کے ذریعے آپ نے غیر قانونی جائیدادیں بنائیں اور اسے فرنٹ مین بنا کر بہت بڑے کام کئے ہیں۔
عابد شیر علی کا کہناتھا کہ مجھے معلوم ہے کہ آپ کے والد صاحب چھابڑی لگایا کرتے تھے اور آپ خود سڑک چھاپ تھے لیکن ایک سڑک چھاپ لندن آ کر آٹھ آٹھ پراپرٹیز کا مالک بن گیا جس کی مالیت میلنز پاونڈ ہیں ۔ان کا کہنا تھا کہ آپ نے کہا کہ عابد شیر علی نشے کی حالت میں ہیں اور اس کے علاوہ پتا نہیں کیا کیا کہا لیکن میں آپ کے بارے میں ایسی زبان استعمال نہیں کروں گا ۔ عابد شیر علی کا کہناتھا کہ میں چیف جسٹس ثاقب نثار اور چیئرمین نیب سے مودبانہ گزارش کرتاہوں کہ وہ اس معاملے پر تحقیقات کیلئے جے آئی ٹی تشکیل دیں۔
عابد شیر علی کا کہناتھا کہ مجھے پتا ہے کہ بلا کن کن کا فرنٹ مین ہے اور اگلی پریس کانفرنس میں بھی میں اس کے آفس میں جا کرکروں گا۔آپ بتائیں کہ آپ کے والد کوئی ٹاٹا کمپنی کے ڈائریکٹر جنرل تھے، آپ پیسوں کا ذریعہ بتادیں کہ پیسے لندن کیسے لائے۔