کیا ماہرہ خان نے منگنی کرلی؟
پاکستان کی خوبرو اور معروف اداکارہ ماہرہ خان کی ترکی میں اپنے دیرینہ دوست کے ساتھ منگنی کی افواہیں گردش کررہی ہیں۔
ماہرہ خان ان دنوں ترکی میں ایک دوست کی شادی میں شرکت کے لیے موجود ہیں جہاں وہ اپنے دوستوں کے ساتھ خوب انجوائے کررہی ہیں، ساتھ ہی وہ اپنے مداحوں کے ساتھ ترکی میں گزارے جانے والے خوبصورت لمحوں کی تصاویر بھی شیئر کررہی ہیں۔
تاہم بھارتی میڈیاکی جانب سے جاری ہونے والی رپورٹ کے مطابق ماہرہ خان ترکی میں دوست کی شادی میں شرکت کے لیے نہیں بلکہ اپنی منگنی کے لیے موجود ہیں اور انہوں نے وہاں اپنے دیرینہ دوست سلیم کریم کے ساتھ منگنی بھی کرلی ہے۔
بھارتی میڈیا میں ماہرہ خان کی تصاویر بھی وائرل ہورہی ہیں جن میں وہ سلیم کے ساتھ نہایت خوشگوار انداز میں کھڑی ہوئی نظر آرہی ہیں۔ رپورٹ کے مطابق یہ تصویر ایک پارٹی کی ہے جہاں دونوں نے ایک ساتھ ڈانس بھی کیاتھا۔ ماہرہ خان کی منگنی کی خبر سوشل میڈیا پر جنگل کی آگ کی طرح پھیل گئی ہے۔
تاہم ماہرہ خان کے قریبی ذرائع نے منگنی کی افواہوں کی تردید کردی ہے ایکسپریس ٹریبیون کے مطابق ماہرہ خان کے قریبی ذرائع کا کہنا ہے کہ منگنی کی خبروں میں کوئی سچائی نہیں ماہرہ خان دوست کی شادی میں شرکت کے لیے ترکی گئی ہیں۔
واضح رہے کہ ماہر ہ خان پہلے سے شادی شدہ ہیں، وہ 2007 میں علی عسکری کے ساتھ شادی کے بندھن میں بندھی تھیں تاہم دونوں میں 2015 میں علیحدگی ہوگئی، دونوں کا ایک بیٹا اذالان ہے۔
ماہرہ خان کافی عرصے سے شوبز میں کام کررہی تھیں تاہم انہیں شہرت ڈراما سیریل ’ہمسفر‘سے ملی بعد ازاں ان پر قسمت کی دیوی مہربان ہوگئی اور انہوں نے بھارتی فلم انڈسٹری میں بالی ووڈ کنگ شاہ رخ خان کے ساتھ فلم’رئیس‘سےفلم ڈیبیو کیا، آج ماہرہ خان کا شمار نہ صرف پاکستان کی بلکہ ایشیا کی مقبول ترین اداکاراؤں میں ہوتا ہے جن کے بھارت میں بھی کروڑوں مداح موجود ہیں۔