رنبیر کے شادی میں نہ آنے پر حیرت زدہ نہیں ہوں، دپیکا
بالی ووڈ کی ڈمپل گرل دپیکا پڈوکون نے اپنی شادی کے استقبالیے میں سابق بوائے فرینڈ رنبیر کپور کے نہ آنے پر کہا ہے کہ وہ رنبیر کے نہ آنے پر حیرت زدہ نہیں ہیں۔
دپیکا پڈوکون نے اٹلی میں رنویر سنگھ سے شادی کے بعد بھارت کے شہر ممبئی میں یکم دسمبر کو شادی کے استقبالیے کی تقریب منعقد کی تھی جس میں بالی ووڈ سے وابستہ کئی نامور شخصیات نے شرکت کی تھی لیکن اُن کے سابق بوائے فرینڈ اور معروف اداکار رنبیر کپور نے اس پارٹی میں شرکت نہیں کی۔
بریک اپ کے بعد بھی دونوں کے درمیان دوستی قائم ہے لیکن اس کے باوجود رنبیر کی شادی میں شرکت نہ کرنے سے کئی سوالات پیدا ہوگئے تاہم اس حوالے سے دپیکا کا کہنا ہے کہ ’ استقبالیے سے قبل ہمارے درمیان بات چیت ہوئی تھی لیکن اس کے بعد سے ہماری درمیان کوئی بات نہیں ہوئی‘۔
اداکارہ نے مزید کہا کہ رنبیر کی عدم شرکت پر حیرت زدہ نہیں ہوں، دوستی کا جو رشتہ ہم شیئر کرتے ہیں وہ اس رشتے کی خوبصورتی کا اظہار ہے جہاں بغیر کچھ کہے بہت کچھ کہہ دیا جاتا ہے۔
واضح رہے کہ دپیکا پڈوکون اور رنویر سنگھ کے استقبالیے کی تقریب میں رنبیر کپور کے ساتھ ساتھ عالیہ بھٹ بھی شریک نہیں ہوئی تھیں۔