” خدا کا واسطہ ہے، اللہ رسول کا واسطہ ہے، میں ہاتھ جوڑتا ہوں، میرے بچو یہ کام نہ کرو“ شیخ رشید نے نوجوانوں کے آگے ہاتھ جوڑ دیے
وفاقی وزیر ریلوے شیخ رشید احمد نے کہا ہے کہ انہوں نے ایک روپیہ لگائے بغیر 10 ٹرینیں چلا دی ہیں اور مزید ٹرینیں بھی چلائیں گے۔ انہوں نے نوجوانوں کے آگے ہاتھ جوڑدیے اور کہا کہ ریلوے ٹریک پر کرکٹ نہ کھیلیں۔
میڈیا سے گفتگو کرتے ہوئے شیخ رشید احمد نے کہا کہ ایک روپیہ لگائے بغیر 10 ٹرینیں شروع کیں اور مزید بھی شروع کریں گے۔ خواہش ہے ایم ایل ٹواورتھری کابھی افتتاح کردیں،ریلوے کی ترقی سے ہی سی پیک کو کامیابی ملے گی۔پاکستان ریلوے 65 فیصد آبادی سے گزر رہی ہے ، کوشش ہوگی کہ نالہ لئی پرریلوے ٹریک بچھایاجائے۔
انہوں نے کہا کہ 9 کروڑ 70 لاکھ روپے کی ایک دن میں تاریخی آمدن ہوئی، ریلوے کے کرایوں میں اضافہ کیاہے لیکن 100 ٹرینوں کو ابھی چھیڑا نہیں ہے ۔ شاید ہم 10 ارب کے منافع تک پہنچ جائیں ، فریٹ ٹرین شروع ہونے سے ریلوے کی آمدن میں اضافہ ہوگا۔
شیخ رشید احمد نے ہاتھ جوڑتے ہوئے کہا کہ’ میرے بچو ریلوے ٹریک پر کرکٹ نہ کھیلو، خدا کا واسطہ ہے، اللہ رسول کا واسطہ ہے، میں ہاتھ جوڑتا ہوں، ابھی ٹرینیں کم ہیں لیکن کچھ دن میں مزید ٹرینیں چلیں گی اور ہر 10 منٹ بعد کراسنگ ہوگی تو مسئلہ ہوگا، 2 ہزار ریلوے کراسنگز ایسی ہیں جن پر پھاٹک نہیں ہیں، ہمارے پاس فی الحال اتنے وسائل نہیں کہ پھاٹک لگاسکیں‘۔